Өмнөговь аймгийн Цогтцэций сумын багш нартаа

Багш:                       Б.Мөнхтуул

Блогийн хаяг:          www.monhtuul.blogmn.net

Блогийн нэр:            Сургалтын блог

Блогийн танилцуулга: Туршлага солилцох тухай

Бичлэгийн ангилал: байхгүй

Холбоос:  3

Нээсэн огноо: 2012.02.07

Сургалт, Сургалтын блог гэсэн гарчиг бүхий  2 мэдээ оруулсан.

Эцэг эх, сурагчдад зайн сургалт явуулах, сурган хүмүүжүүлэх зөвлөгөө өгөх зорилгоор үүсгэсэн сургалтын блог нь туршлага солилцох тухай гэсэн танилцуулгатай байж болохгүй. Математикийн хичээлийн зайн сургалт явуулах гэж болно.

Багшийн сонгосон энэ загвар нь бичлэгийн ангилалгүй тул ангилалтай загвар сонгох хэрэгтэй. Бичвэрийн тоо нэмэгдэх тутам эцэг эх, сурагчид блогоос мэдээлэл авах нь хүндрэлтэй болдог тул ангилал хийснээр хайж буй мэдээллийн ангиллаа сонгоод байршуулсан нийтлэлийг уншихад хялбар байх болно.

2012.02.07-нд блогоо нээж, 2 мэдээ оруулснаас хойш хөтлөлт хийгээгүй байна. Иймд бие даалтын даалгавар, зайн сургалтын хичээл, сурган хүмүүжүүлэх зөвлөгөө, зааж буй хичээлээр болон сургууль, ангидаа зохиогдож буй арга хэмжээг сурталчилсан фото зургаар баяжуулсан мэдээ мэдээлэл, ангийн тэргүүний сурагчдыг алдаршуулах мэдээлэл тогтмол байршуулах  хэрэгтэй байна.

Багш өөрийн зураг, хичээл зааж буй зураг, ангийнхаа сурагчидтай хамт авахуулсан зургийн аль нэгийг танилцуулга хэсэгт оруулах шаардлагатай.

Тэргүүний сурагчид, манай ангийн бахархал гэсэн ангилал нээж, математикийн хичээлээр болон дааж авсан ангийнхаа тэргүүний сурагчдын фото зурагтай мэдээллийг байршуулах нь эцэг эхийн хүүхдээрээ бахархах сэтгэл, сурагчийн идэвх чармайлт, өөртөө итгэх итгэлийг нэмэгдүүлэх сайн талтай байдаг.

Зөвлөмж:

Багшийн сургалтын блогт тавигдах шаардлага:

1. Бичлэгийн  ангилалтай байх
2. Блогийн ерөнхий дизайн, зураг нь этгээд бус байх
3. Өнгөний зохицол сайн байх
4. Блогт оруулж буй сургалтын материал нь зөв бичих дүрмийн алдаагүй, найруулга сайтай байх

Бичлэгийн ангиллыг дор дурдсан байдлаар үүсгэж болно. Үүнд:

1. Мэдээ мэдээлэл
2. Зар мэдээ
3. Бие даалтын даалгавар
4. Эцэг эхчүүдэд сурган хүмүүжүүлэх зөвлөгөө
5. Сурагчдад зөвлөгөө
6. Цахим судалгаа  гэх мэт

Сургалтын болон хичээлээс гадуур зохион байгуулагдаж буй үйл ажиллагааг сурталчилсан мэдээ мэдээлэл, хариуцаж ажиллуулдаг хүүхэд хөгжүүлэх сонгон, секц, дугуйлан, клубын  үйл ажиллагааны  төлөвлөгөө, хуваарь, зохиогдож буй арга хэмжээг сурталчилсан  фото зургаар баяжуулсан мэдээ мэдээллийг тогтмол байршуулах нь багшийн сургалтын блогт зочлох эцэг эх, сурагчдын тоог нэмэгдүүлэх болно.

Мөн

-       Рациональ  тэгшитгэл, тэнцэтгэл биш, систем

-       Иррациональ тэгшитгэл ба тэнцэтгэл биш

-       Илтгэгч  тэгшитгэл, тэнцэтгэл биш

-       Логарифм тэгшитгэл, тэнцэтгэл биш

-       Тригонометр

-       Интеграл

-       Магадлал

гэх мэтээр хэддүгээр ангид хичээл зааж буйгаас хамааран бүлэг сэдвээр ангилал үүсгэж, бие даалтын даалгавар, зайн сургалтын хичээл, үнэлгээний цахим тест байршуулахад болно.

TV хичээл байдлаар бэлтгэсэн хичээл нь зөвхөн зайн сургалтын хичээлд хамаарагдана гэсэн буруу ойлголт багш нарт байдаг бөгөөд

-     Бүлэг сэдэв, нэгж хичээлийн хөтөлбөрийн сэдвээр бие даалтын даалгавар тодорхой хугацаанд өгөөд сурагчид даалгавраа хураалгуулсны дараа зөв хариултыг  байршуулах

-      Хоцрогдолтой сурагчдад зориулсан цуврал хичээл

-      Түлхүү түвшний сурагчдад зориулсан цуврал хичээл байршуулах зэргээр зайн сургалт явуулж болно.

Зайн сургалтын хичээл нь аудио, видео, PDF, Хэрэглээний програмууд ашиглаж хийх  гэх мэтээр ямар ч хэлбэртэй байж болно.

Жнь: Квадрат тэгшитгэл бүлэг сэдвийг үзэж эхлэхийн өмнө хичээлийн нийт цаг,  сурагчдын эзэмших мэдлэг, чадвар, бие даалтаар ямар  даалгавар хийх, хэзээ гүйцэтгэсэн байх,  шалгалт хэзээ авах, шалгалтын жишиг даалгавар гэх мэт сургалтын дэлгэрэнгүй мэдээллийг блогтоо байршуулах хэрэгтэй юм.

Улмаар  тухайн сэдвээр бие дааж бодох бодлогыг байршуулаад сурагчид даалгавраа хураалгах сар, өдрийг тодорхой зааж өгнө.

Сурагчид бие даалтын даалгавраа хураалгуулсны дараа зөв хариултыг  үнэлгээтэй хамт байршуулна. Зөв хариулт байршуулсны дараа сурагчдын дэвтрийг буцааж өгч, хийсэн даалгавраа багшийн зөв хариулттай тулгаж,  алдаагаа олох, өөртөө үнэлгээ өгөх, буруу бодсон бодлогоо зөв болгож бодох даалгавар өгнө.

Багш сурагчийн бодсон бодлогыг зөв, буруу гэж зассан үед сурагч үнэлгээгээ харахаас яг юун дээр алдаж вэ гэдгээ анхаардаггүй тал байдаг тул сурагчаар өөрөөр нь алдааг  олуулах нь ямар нэг зүйлд дүн шинжилгээ хийлгэж сургах, зөв бодолтыг дахин хийлгэх нь ойлгоогүй зүйлээ мэдэж авахад тустай байдаг.

Бие даалтаар 50 бодлого өгөх шаардлагатай үед тодорхой хугацаа зааж, 10-15 бодлогоор цувуулж өгөх нь тухайн даалгаврыг хүлээж авч байгаа сурагчийн сэтгэл зүйд эерэгээр нөлөөлж, даалгавар гүйцэтгэх сурагчдын тоо, гүйцэтгэлийн чанарыг нэмэгдүүлдэг. 50 бодлого яаж бодно доо гэж  хүлээж авах, зөвхөн 10 бодлого л бодно гэж бодохын ялгаа их байдагт оршино.

Сургалтын блог тогтмол хөтөлснөөр багш хөгжих, интернэтийн болон компьютерийн мэдлэг, чадвар дээшлэх, багшийн хөгжлийг дагаад эцэг, эх, сурагчдын интернэт ашиглах чадвар сайжрах, орон зай, цаг хугацаанаас үл хамаарч зайн сургалтад хамрагдах, сурган хүмүүжүүлэх зөвлөгөө авах ач холбогдолтой юм.

Төсөл хэрэгжиж буй сургуулиудын багш нарын дунд зарлагдсан “Шилдэг сургалтын блог” шалгаруулах уралдаанд амжилттай оролцоно гэдэгт итгэж байна.

Зөвлөмж бичсэн: Төслийн зохицуулагч П.Энхмаа